ဘူရီယမ်မှာပျော်ပါနေခြည်

မြို့လေးက အေးဆေးပဲနော်။ ဘန်ကောက် ချင်းမိုင်ထက် ခွန်းခဲ့နဲ့ ဒီမြို့ကို ငါပိုသဘောကျတယ်လို့ စကားမရှိစကားရှာလိုက်တယ်။

မြို့လေးက လကုန်ရက်မို့ငြိမ်သက်နေတာလို့ပြန်ပြောတယ်။ လကုန်ရက်က ပိုစည်ကားရမှာမဟုတ်ဘူးလား သောကြာ၊ လခထုတ်ရက်လေဟာလို့ ပြန်မေးရင်း ဟိုတယ်ကောင်တာက ညီမလေးနဲ့ အလာပသလာပ စကားပြောဖြစ်ကြတယ်။

အိမ်ခန်းစျေးတွေအကြောင်း၊ မြို့စီးပွါးရေး၊ လည်စရာနေရာတွေ၊ ဧည့်သည်အခြေအနေ ဘာညာရွှီရှောင်။

မေးရင်းပြောရင်းကနေ တို့မြန်မာတွေ ထိုင်းကိုအများကြီးပြောင်းလာတာ ဘယ်လိုမြင်သလဲမေးကြည့်တော့ စဉ်းစားသယောင်လုပ်ပြီး ကောင်းတာပေ့ါတဲ့။ ရယ်ပြီးထပ်ပြောတာ ငါတော့ဘယ်လိုမှ မမြင်ပါဘူး။ အခု အုပ်ချုပ်တဲ့သူကို နင်တို့မကြိုက်လို့ စစ်ပွဲတွေဖြစ်နေတာ သိတယ်တဲ့။ ဒါငါ့ခွင်ပဲဆိုပြီး အခြေအနေတွေနည်းနည်းရှင်းပြတော့ အွန်းအွန်းတဲ့။

အလုပ်ချိန်ဆို တီဗီဖွင့်ထားတော့ သတင်းဟိုကြည့်သည်ကြည်ပေါ့တဲ့။ တခါတလေ သတင်းထဲပါတာတွေ့မိပေမဲ့ ထွေထူးတော့ ဘာမှမခံစားရဘူးဆိုပဲ။ နင်တို့မကြိုက်လို့ ပြန်တိုက်တာဖြစ်ဖြစ်၊ ပြောင်းလာတာဖြစ်ဖြစ် နင်တို့အခွင့်အရေးပဲလို့ပြောလေရဲ့။

တက္ကသိုလ်ဘွဲ့ရ။ သူငယ်ချင်းဆရာမတစ်ယောက်နဲ့ အတူတူအိမ်ငှါးနေတယ်။ အားလပ်ချိန်တွေ ဘာလုပ်လဲမေးတော့ အားတဲ့အချိန် ရုပ်ရှင်တွေကြည့်တယ်တဲ့။ ရယ်ပြီးပြောသေးတယ်။ ငါက ထိုင်းရုပ်ရှင် ထိုင်းစီးရီးကလွဲပြီး ကျန်တာအကုန်ကြည့်တယ်တဲ့။ ငါလည်းတူတူပဲ မြန်မာကားတွေကလွဲလို့ အကုန်ကြည့်တယ်လို့ပြောပြီး မတိုင်ပင်ဘဲ ရယ်မိကြတာပဲ။

K-Drama, C-Drama တွေအပြင် Super Hero movies ကအစ GoT, HoD အဆုံးအကုန်လေပေးဖြောင့်တယ်ဗျာ။ ကိုယ်က K-Drama သိပ်မသိလို့ သူက ညွှန်း၊ ကိုယ်ကလည်း ကိုယ်ကြိုက်တာတွေပြန်ညွှန်းပဲ။ တခါတခါစကားလုံးရှာမရရင် ဂူဂဲလ်စကားပြန်ပြီး ရှင်းပြသေးတယ်။

နင်ရောက်တာကြာပြီဆို ထိုင်းစကားမတတ်သေးဘူးလားတော့မေးတယ်။ အေး ငါက တစ်နှစ်သုံးလေးကို မပြောတတ်ဘူးဟေ့ ဆိုတော့ တဟားဟားရယ်ပြီး ရှုပ်ပါတယ်ဟာ သင်မနေပါနဲ့တဲ့။ အေးတာပဲ။

နာမည်လည်း မမေးလိုက်ဘူး။ လိုင်းဘာညာလည်း မအက်ဘူး။ ပြောစရာရှိတာပြောပြီး ငါဂျူတီထွက်ပြီ တာ့တာလုပ်ပြီး ဆိုင်ကယ်လေးနဲ့ ပြန်သွားလေရဲ့။ ဒါပဲ။